早兩日介紹到隋朝佛首嘅時候,阿史就提到呢個佛首以及同期喺法國被納粹德軍搶奪嘅文物,呢啲文物之所以最後可以送返去持有人嘅手,最主要係因為一個人,呢個人就係Rose Valland。
喺介紹Rose Valland之前,阿史就想同大家講套戲先,就係呢套真人真事改編,早幾年好熱門嘅《古文明救兵》(The Monuments Men)。呢套電影劇情就係講述二戰納粹德軍侵略歐洲果陣,希特拉就藉機掠奪大量珍貴藝術品,電影入面嘅英美歷史學家同埋博物館成員就一邊同德軍對抗,一邊救返唔少藝術珍品。雖然當中有唔少都係電影情節,但呢啲角色唔多唔少真係參照咗當年有份救文物嘅人而設計。
就好似佐治古尼就係扮緊George L. Stout、麥迪文就係James Rorimer、而凱特布蘭琪就係飾演呢件事最重要嘅人物Rose Valland。喺歷史上Rose Valland就係藝術歷史學家,戰爭未發生之前就係國立網球場現代美術館做野,當德軍佔領咗巴黎之後,佢就假扮投誠幫手管理美術館,但暗地就記錄晒所有藝術品來源、編號、運送目的地等等嘅資料,同時亦都將文物所有地嘅位置交畀盟軍,呢個舉動令到唔少文物都可以逃過戰火摧殘。雖然係咁,但佢喺戰後曾經都被視為係法奸、要等到盟軍出面先還到佢清白。佢戰時英勇嘅舉動,事後就分別得到法國、德國同埋美國頒予勳章致謝。
原圖嚟自網絡