唔知有返咁上下年紀嘅史友有冇聽過、甚至乎參加過以下阿史想介紹嘅呢個節日呢？呢個就係1969年所舉行嘅第一屆香港節喇！

呢個香港節（Festival of Hong Kong）係由當年嘅港府發起，並且由港府同埋一批商業機構出錢贊助，目的就相當純粹，就係想喺當時社會狀況同埋世界政局相當動蕩嘅年代，去舉辦一個活動去安撫民心，帶嚟一啲歌舞昇平嘅氣氛。

於是，喺1968年港府就成立咗一個指導委員會，研究為香港安排一星期娛樂嘅可行性，當時委員會就打算撥款200萬香港節，當時口號就係「色、聲、動、參加、介入及影響」，希望可以令到全民都參加。

經過7個幾月嘅籌備，耗資達400萬港元嘅第一屆香港節喺當年今日正式舉行，當時有一系列嘅文娛康樂活動，就好似郵票、書畫、花卉等展覽，又有軍操表演、嘉年華會、舞會、時裝表演、歌唱比賽等，參觀人次超過500,000，相當熱鬧。

原圖嚟自網絡