每年嘅8月14日，其實都係一個令亞洲人民、中華兒女傷感嘅日子，事關今日其實係「國際慰安婦紀念日」。喺第二次世界大戰期間，日軍為咗滿足軍隊嘅私慾，以詐騙、逼良為娼嘅方式喺中國、朝鮮、馬來西亞、菲律賓等地強逼唔少婦女成為軍妓，亦即係「慰安婦」。喺呢種卑鄙手段之下，後世就統計出中國至少有20萬婦女受害、朝鮮就有14萬，各國加起來至少有40萬人受害。
為咗為呢班受害嘅婦女討回公道，我國以及朝鮮半島早喺二戰後就向日本展開漫長嘅司法程序，要求日本停止修改教科學扭曲歷史以及向所有受害人道歉。而8月14呢一日之所以會被定為「國際慰安婦日」全因為1991年一位韓國「慰安婦」受害者金學順挺身而出，首次公開揭露日軍二戰期間性暴力犯罪並向東京地方裁判所提起訴訟，先至向世界印證「慰安婦」制度確實存在。
時至今日，呢件事已經發生超過30年，但日本方而仍然仲未就事件向受害人道歉。據聯合國人權委員會1996年公布慰安婦調查報告指出慰安婦是「軍事性奴隸」，正式確認日軍違反人道罪行，單單係當時淪為日本殖民管治嘅台灣就已經有2000人受害。為此，台灣團體今日亦都有喺慰安婦銅像前紀念追思，其中一位媒體人就直言，「歷史可以原諒但不能忘記，但原諒也是犯錯者必須先反省、認錯、道歉甚至賠償」，唔知史友們又點睇呢？
原圖嚟自網絡