1935年12月9日，响北平市發生一次愛國抗日運動，呢場運動就係中國近代史上一場著名嘅學生運動──「一二‧九運動」。
响上世紀三十年代，日本不斷展開侵略中國嘅行動，先有1931年嘅「九‧一八」事變同1932年嘅「一‧二八」事變，後嚟又响東北三省成立偽滿州國。到咗1935年，日本推動咗一個叫華北五省自治運動，要求五省脫離南京國民政府控制，以親日派華人組織冀察政務委員會實行華北地區自治。
相關消息傳出後，响北平市嘅廣大學生就响1935年12月9日發起遊行示威，要求國民政府實現抗日。不過，示威隊伍就俾軍警打，百幾個學生受傷，30幾人被捕。北平學聯決定全市學校响10日實行大罷課，以示不滿。北平市內都有好多人同情學生，一個星期後即12月16日有成3、4萬人集會支持學生，軍警又係武力鎮壓，造成400幾人受傷，搞到全市罷課、罷工同罷市，國內其他城市都有聲援學生嘅集會同示威遊行，最終當局只好推遲冀察政務委員會成立。自此之後，「一二·九運動」紀念日就係為咗紀念1935年12月9日同之後發生連串爭取全民抗日嘅愛國運動。
睇返資料，「一二·九」運動係由黃敬等共產黨人組織，目的就係推動停止內戰一致抗日。一二·九運動發生後一年，西安市出現紀念「一二九運動」嘅集會，當時响西安嘅蔣介石要求東北軍主帥張學良處理。但由於張學良心繫全國團結抗日，最終引發西安事變嘅發生。
原圖嚟自網絡