尋日電視台嘅頒獎典禮除咗大小姐、鄭子誠等演員攞獎令唔少觀眾好高興之外，最搶鏡嘅莫過於蕭正楠，佢同曹永廉攞最受歡迎電視拍檔時，突然自爆同黃翠如結咗婚。時間真係過得好快，十幾年前蕭正楠剛剛出道，仲同麥浚龍掀起爭獎風雲，大家仲記唔記得當年發生咩事呢？

話說蕭正楠一開始係參加大型歌唱比賽、獲唱片公司高層賞識而入行，2002年出道嘅同期男歌手仲有Juno麥浚龍、余文樂，而女歌手就有關心妍、李蘢怡等。蕭正楠曾經講過，啱啱出道時啲工作多到接唔停手，佢比較出名嘅歌包括《接受我》、同關心妍合唱嘅《特別鳴謝》等。

蕭正楠嘅氣勢延續到年尾，响新城、十大中文金曲等主要頒獎典禮同麥浚龍爭崩頭，各自掃咗唔少新人獎。去到勁歌頒獎禮，蕭正楠贏咗最受歡迎男新人嘅金獎，麥浚龍就攞咗銀獎，之後嘅慶功宴上，蕭正楠講咗句「邪不能勝正」，被媒體話係暗寸當時盛傳靠造馬而攞獎嘅麥浚龍，外界認為佢依句話得罪咗麥浚龍爸爸，所以被封殺。第二年蕭正楠拍咗個西餅廣告，台詞不斷重覆「???」，被大批網民嘲笑，令佢嘅星途雪上加霜。

對於自己講過嘅「正邪」金句，多年後蕭正楠自己形容當時係「衰戇居」，令佢明白到禍從口出嘅代價同謹言慎行嘅重要性。之後佢唯有返內地拍劇，不過唔紅又無咩知名度，佢三年之內剩係拍咗六套電視劇同電影，計埋公司抽佣，搵得唔多，雖然要慳住使，但點都好過零收入嘅。

後嚟2008年蕭正楠返嚟香港發展，被盛傳係某位高層愛將嘅佢無幾耐就一劇接一劇，好似《大太監》、《仁心解碼II》嘅哨牙醫生、《巨輪》、《超時空男臣》，以及今年嘅《宮心計2深宮計》等，其中2014年拍《師奶Madam》仲識到依家嘅老婆黃翠如添。作為一個望住佢出道嘅觀眾，見到佢成家立室，點都要講句：恭喜曬！

圖片嚟自網絡。