近期大台播緊套民初劇《大醬園》,雖然當中不乏好戲之人(做綠葉),但聲勢似乎唔多強,仲有人話套戲同以前大台啲民初劇差好遠。咁又係呀!大台响八九十年代除咗古裝片、商戰劇外,民初劇都係一大食糊招式。今次阿史就想介紹下九十年代中一套話題作,叫《大鬧廣昌隆》。


《大鬧廣昌隆》一套人鬼戀為主軸嘅電視劇,講一隻女鬼小芙蓉(周海媚飾)魂魄寄居咗响把遮裡面,廣昌隆嘅咕喱大隻廣(林家棟飾)唔覺意用咗把遮,結果就揭開咗一段女鬼同大隻廣搵當年殺死小芙蓉情郎、廣昌隆三少爺(即大隻廣嘅前世)嘅真凶。去到故事尾段天靈大師(單立文飾)想侵吞廣昌隆,經過一輪鬥法,惡人奸角受到應得懲罰,真相大白。


不過提起《大鬧廣昌隆》,除咗一眾演員精采演出外,最為人熟悉就係當中好多鬼怪傳聞。記得當年拍《大鬧廣昌隆》時,已經好多古怪傳聞,唔少工作人員拍拍下受傷,其中一個演員沈威更懷疑自己撞邪,結果拍拍下剃光咗個頭。而男主角林家棟多年後就透露,《大鬧廣昌隆》呢套經典劇目,無論拍粵劇抑或電視劇都一定要用新人,因為套戲好邪,而佢當年拍個陣,大台都要攞去個八字夾一夾。至於係咪咁邪,真係信不信由你。


原圖嚟自網絡