之前阿史介紹咗幾套大台响九十年代嘅民初劇,其實當時亞視都有一套經典民初電視劇,仲因為受歡迎而不斷添食,邊套劇咁厲害?咪就係《再見艷陽天》囉!


《再見艷陽天》係亞視响九十年代中自家製作嘅電視劇,當年亞視响大台邀得陳秀雯擔正做女主角,男主角就係憑《倚天屠龍記》冒起嘅台灣男藝人馬景濤。故事大概係秀巧(陳秀雯飾)盲婚啞嫁嫁咗俾方家少爺方賀生(馬景濤飾),但賀生鍾意嘅係張文鳳(鄧萃雯飾),結果隨著方家各種困難事以及國家嘅動蕩,一眾人經歷無數風風雨雨,至於結局係點?阿史當時無睇,所以唔知。


呢套之所以有人話佢係亞視民初劇最後大作,係因為亞視之後就再無一套民初劇咁具聲勢。當時除咗陳秀雯同馬景濤參演,仲有鄧萃雯、秦沛、林偉、商天娥、邵美琪、黃仲崑等呢啲具一定名氣嘅演員參與演出。記憶中好似因為收視唔錯,所以亞視就不斷改劇本,不斷加角色拖長劇本,最終去到105集。今時今日睇返,係咪好不可思議呢?


原圖嚟自網絡