尋日喺介紹到香港仔隧道嘅時候，阿史就提到現時隧道收費亭嘅位置有一部分係用咗黃竹坑舊圍嘅土地。第一次見到呢個名，阿史就諗，乜原來港島都有圍村架？事實原來唔係咁。

黃竹坑舊圍又有其他嘅名，叫做香港村、香港圍，雖然有個「圍」字，但其實呢條村並唔係傳統圍村。黃竹坑舊圍昔日嘅位置其實就係依家香港仔隧道出口同埋黃竹坑醫院，講起呢條村真係歷史悠久。

關於黃竹坑舊圍，喺明朝嘅《粵大記》入面就有記載過呢條村，早喺嘉靖二十九年，因為石排灣一帶有住唔少轉運莞香嘅業務，間接促成咗呢條鄉村嘅建立，因為係運香嘅港口所以又有「香港」呢個叫法。雖然曾經有住港口轉運嘅商業發展，但去到清朝初年就因為禁海令，令到呢條村一度荒廢，直到乾隆二十四年先至復村。

心水清嘅史友可能都會留意到，黃竹坑既然有舊圍，自然都會有新圍，原來去到1860年代由於人口不斷增加，村民就喺村落以東發展新圍，晚清香港著名嘅人物周壽臣就係喺新圍長大。踏入1970年代尾，隨著香港仔隧道工程展開，黃竹坑舊圍大部份地方都被強逼拆卸，淨低嘅舊圍土地逐漸由非原姓居民遷入居住。

原圖嚟自網絡