八仙嶺下嘅鶴藪水塘

過去都同史友們介紹過香港唔同時期建設嘅大型水塘，就好似薄扶林水塘、船灣淡水湖、萬宜水庫等等，但值得介紹嘅水塘又點止呢幾個？今次阿史就同大家講一講呢個行山人士相當鍾意嘅鶴藪水塘。

鶴藪水塘位處粉嶺平原東端，係八仙嶺郊野公園範圍入面，因此鄰近鶴藪圍而取名鶴藪水塘。呢個水塘雖然喺1968年建成，混凝土主壩高18米、長102.1米，水塘容量僅僅得18萬立方米，屬於規模比較細嘅水塘。

之但係其實佢並唔係一個獨立嘅水塘，當年興建呢個水塘嘅目的係為咗收集八仙嶺西北部水源，繼而可以通過輸水管供應畀船灣淡水湖。而鶴藪水塘嘅作用其實唔淨止得供水，佢同時亦係灌溉水塘，負責灌溉附近農田。時至今日，由於鶴藪水塘嘅地理位置係多條郊遊路線嘅交匯地，所以路徑四通八達，亦都係唔少行山人士熱門嘅行山地點。