上次提及過中環擺花街同外籍妓女做生意有關,其實响百幾年前中環一帶都係居港洋人活動嘅地方,除咗紅毛嬌外,中環有個地方叫是非角,都係同外國人有關。
呢個是非角位於依家香港公園東入口附近,原本係一條小徑,由聖約翰座堂至堅尼地道。點解呢個地方會有個咁嘅名呢?話說响英國管治香港島初期,島上最具規模嘅教堂聖約翰座堂成為居港洋人周末做禮拜嘅地方。可能佢哋一星期先聚一次,所以禮拜完畢後啲洋人就會去附近小徑繼續吹水,漸漸呢條小徑就被稱為「是非角」喇!
記得讀大學嗰陣教香港史嗰位老師講過,以前啲洋人講嘅是非係一個研究當時社會情況嘅有趣資料,好似港督軒尼詩响路上追打疑似「姦夫」,就係以前响啲洋婦日記中記錄咗落嚟。
原圖嚟自網絡