沒有最瘋狂，只有更瘋狂。太平天國洪秀全係一個幾傳奇既人物，佢1814年（嘉慶十八年）响廣東省花縣出世，早年接觸到由梁發所寫嘅《勸世良言》，從中得到啟發，自稱係上帝嘅細仔、耶穌嘅細佬，受上帝之命下凡誅妖。佢後來創立「拜上帝會」，仲喺廣西金田發動太平天國起義，攻克18個省份超過600座城市，包括被改名做「天京」嘅江寧府（今南京），並定為首都、建立政權。

太平天國推行咗唔少政策，例如《天朝田畝制度》，希望達到「有田同耕，有飯同食，有衣同穿，有錢同使，無處不均勻，無人不飽暖」嘅理想社會。不過阿史就覺得，個個搞起義都係有咁大吹咁大，爭取支持㗎啦。另外，太平天國亦都曾經舉行科舉，特設「女科」選「女狀元」，都算係一個突破，而中國歷史上第一位、唯一一位「女狀元」就係太平天國嘅傅善祥。

太平天國維持咗十幾年就被瓦解，無法推翻滿清，失敗嘅主要原因就係發生「天京之變」同「翼王出走」兩件大事，導致太平天國由盛轉衰。1856年嘅「天京之變」同領導層嚴重內訌有關，導致幾位高層包括東王楊秀清、北王韋昌輝同燕王秦日鋼喺事件中死亡。

話說當時掌握大權嘅楊秀清，逼洪秀全封佢做「萬歲」，洪秀全假意應承，但就密詔北王、燕王同翼王石達開入天京剷除楊秀清。北王同燕王入天京殺死楊秀清之後，北王再喺城內大殺異己。石達開抵達後發現有部下被殺，於是責備北王同燕王，不過石達開驚被報復，於是就離開天京，而北王因為搵唔到石達開，於是就殺晒石達開嘅家屬同部屬。後來石達開起兵討伐北王，又要求洪秀全處死對方。由於太平軍大多都支持石達開，於是洪秀全就處死咗北王同燕王等人，並將殺死楊秀清嘅責任推晒俾北王韋昌輝。

石達開其後執掌大權，但洪秀全就安排親信牽制佢，令石達開領兵出走。太平天國接連「地震」，導致人心散渙，國力轉衰。去到1864年，清軍包圍天京，天京糧食不足，洪秀全帶頭食草團充飢，結果喺1864年6月1日响天京病逝，但有另一個講法就係，洪秀全其實係服毒而亡。之後清廷收復南京，曾國藩下令挖出洪秀全嘅屍體，用刀戮、用火燒，更命人將啲骨灰溝埋火藥，裝入炮彈之後再轟出去，令洪秀全「灰飛煙滅」。