上次講起洪秀全，阿史想再分享多少少。洪秀全早年嘅時候嘗試考取功名，仲屢敗屢試，喺佢第三次落選嘅時候，因為大受打擊而大病一場，一度昏迷同出現幻覺，話有個老人講佢知，佢係上天派嚟落人間斬妖除魔。之後洪秀全再考第四次，最後都名落孫山，佢睇返之前收到嘅《勸世良言》，諗返起之前嘅幻覺，認為係真實發生過，仲無啦啦認上帝同耶穌做親戚。

洪秀全憑住自己對《勸世良言》嘅理解，喺未睇過《聖經》嘅情況下，1844年創立「拜上帝會」。其後喺1847年，洪秀全向傳教士羅孝全學習幾個月，並要求受洗，但羅孝全拒絕。據講，羅孝全say no，其中一個原因係唔認同佢「幻覺當真理」。所以嚴格嚟講，洪秀全並唔係真正嘅基督徒。

不過洪秀全係咪真心相信基督教，其實都有唔同講法。比較流行嘅一種講法，就係話佢只係拎基督教做幌子，用嚟招攬信眾。而另一個講法就係，洪秀全真係信基督教，只不過係受幻覺影響同埋信錯《勸世良言》，再加上初時無人指導，導致佢錯誤解讀基督教。而洪秀全後來認識羅孝全嘅時候，拜上帝會已經有一定規模，難以修改教義。所以話，一早就要病向淺中醫，唔好當唔知。

其實洪秀全本身嘅生活相當荒淫，拜上帝會起義初期，據講已經有三十六個妻妾，之後去到武昌佢又搞「選妃」，並「得十餘齡殊色女子六十人」。太平天國攻陷江寧府（今南京）之後，洪秀全將兩江總督處修建成天朝宮殿，同啲妻妾一齊住。太平天國滅亡後，佢個仔洪天貴福被俘，供稱自己有八十八個母后。

阿史諗咗好耐，洪秀全人就得一個，點分？