仲記得細個讀小學上宗教堂嗰時，一定會教先知約翰响約旦河幫耶穌施洗呢個故事。約旦河起點黎巴嫩、敘利亞，經以色列、巴勒斯坦、約旦等地，流入死海。舊約聖經記載約旦河水源充沛：「約旦河整個平原，直到左哈爾一帶全有水灌溉」。
由於近代保育工作不力，約旦河宜家面對住乾涸同污染嘅問題。不過對唔少基督教徒黎講，約旦河依然係一個觀光朝聖地，圖入面就係位於約旦，相傳耶穌受洗時嘅約旦河外伯大尼遺址。