話說喺今年1月，立陶宛嘅「出世紙」終於回歸，唔單止舉國同歡，總統仲喺2月16號邀請歐盟各國領導人去立陶宛慶祝，究竟點解立陶宛人咁重視呢張「出世紙」嘅？咁就要由古代立陶宛嘅歷史講起。

古代立陶宛曾經係歐洲中古時期嘅強國，宜家嘅立陶宛、白俄羅斯、烏克蘭大部份土地同部份俄羅斯土地，都喺古代立陶宛嘅管治之下。由波羅的海到黑海，都係佢嘅勢力範圍。1569年，立陶宛同波蘭成立咗波蘭立陶宛聯邦，兩國聯合，開頭的確係國力倍增嘅歐洲大國，但由於長期嘅對外戰爭，國內動亂，國力迅速衰退，最終喺1772年、1793年同1795年被俄羅斯、普魯士同奧地利相繼瓜分。立陶宛嘅領土，自此成為沙俄版圖嘅一部份。

喺第一次世界大戰期間，立陶宛被德國佔領。1917年，俄國接連爆發二月革命同十月革命，德國又喺第一次世界大戰入面戰敗，襯住呢個時機，立陶宛喺1918年2月16號宣布獨立。立陶宛嘅「出世紙」就係紀錄咗呢一日嘅獨立宣言。呢份「出世紙」當年一共簽咗5份，照計立陶宛、德國、蘇聯都有嘅，可惜當年三個國家都處於兵荒馬亂嘅時期，立陶宛同蘇聯果份都搵唔到，最後剩返德國仲保留住。

而今次「返屋企」嘅「出世紙」，就係立陶宛喺德國借過嚟嘅，2023年就要還返俾人喇。