唔係阿史黑心，做過南韓總統嘅人，好似個個都中咗魔咒咁，輕則鋃鐺入獄、重則不得好死。獨裁威權時代唔計，近幾屆南韓民主化後選出嚟嘅民選總統，除咗金泳三外（金泳三個仔都入過獄），其他下場都認真麻麻，呢份工可謂相當「惡啃」。引發阿史咁講嘅，梗係近日被指涉嫌貪污受賄而正式被捕嘅前總統李明博啦，呢位個「CEO總統」之稱嘅政治人物，無論喺商界，抑或後來加入政界，一向都以有「驚人決心」而聞名，故此除咗「CEO總統」外，更有「推土機」（代表夷平一切障礙）嘅稱號。

由於李明博仲未罪成，故此阿史都唔講佢「下場」住。今次反而想講吓，過去幾任南韓民主總統出咗乜事。首先要講嘅係盧泰愚，呢位前總統係南韓繼朴正熙後，第一個真正意義上民選總統，軍人出身嘅佢，88-93年上場後，最出名係同社會主義國家，包括中國建交。至於佢下場，係囉，咪就因為參與「軍事叛亂」同「內亂」被判監囉。

另一名要講嘅係金大中，金大中喺98-03年出任南韓總統，雖然佢卸任後冇被人控告，不過佢幾個仔，包括大仔金弘一，因受賄被判有期徒刑兩年；二仔金弘業，同樣因為受賄同逃稅被判刑，至於三仔金弘傑，同樣因受賄賂同逃稅被判刑兩年。雖然金大中本身冇事，不過三個仔都相繼出事，都咪話唔陰公。

至於繼金大中後做南韓總統嘅係盧武鉉，呢位前總統下場最慘，佢任內積極推行同北韓修好嘅「陽光政策」，令到兩韓關係回暖，但點知卸任後一年左右，就因為「綜合受賄罪」受到調查，不過都未正式上庭，盧武鉉就喺屋企附近個「貓頭鷹岩」跳崖自殺身亡。

最後，要講嘅當然係南韓首位女總統朴槿惠，佢下場係點，而家都未知，不過佢因為「閨密干政風波」而五年任期都未做完就畀南韓憲法法院彈劾落台，最近仲被韓國檢控單位求刑三十年。

講到底，南韓雖然有民主選舉，但社會傳統同實際上都係財閥同金權政治橫行，政府同商界關係千絲萬縷，事實證明呢種關係，並唔會因為民主選舉而改變到。