伊朗打入2018年世界盃決賽週，政府開放全國最大嘅阿扎迪球場俾民眾甚至係女性球迷入場睇國家隊比賽，當見到國家隊入波果陣，唔少女球迷仲除埋頭巾載歌載舞添。呢啲我哋覺得好平常嘅畫面，原來喺伊朗會被保守派人士非議，佢哋覺得女性入球場睇波已經唔應該，唱歌跳舞就更加令人蒙羞，唔單止有愧於革命先烈，仲出賣咗伊斯蘭革命。

呢場喺1978年醞釀嘅伊斯蘭革命，係由於伊朗人民不滿伊朗君主體制而發起嘅大規模罷工示威遊行，罷工遊行斷斷續續維持咗成年，幾乎令成個國家癱瘓。1979年，當時嘅君主沙阿被逼流亡海外，游擊隊同叛軍戰勝咗效忠沙阿嘅部隊，皇室政權瓦解。經過全國公投之後，伊朗喺1979年4月1號成為伊斯蘭共和國，而在外流亡咗15年嘅霍梅尼成為國家嘅最高領袖。

由於沙阿政權以西方法律取代伊斯蘭教法，禁止女性穿伊斯蘭教服飾同戴頭紗，所以對於政府今次俾女球迷入場，保守派人士就認為係重返沙阿政權嘅政策，出賣咗伊斯蘭革命。