上星期講到《聊齋》嘅角色陸判幫豬豬地嘅朱爾旦換心，成功令朱爾旦脫胎換骨，仲攞咗鄉試第一名。得一想二嘅朱爾旦希望陸判再幫多個忙，換咗老婆個頭，點知牽連出一單兇案，變成殺人嫌疑犯？

話說當時陸判聽咗朱爾旦嘅換頭要求後，有晚拎住嗰人頭到訪，朱爾旦一望，人頭上嘅血跡居然仲有溫度。陸判後嚟用刀斬咗朱爾旦老婆原本個頭落嚟，將個靚女頭砌落去，左整整右整整，搞掂！朱太無幾耐醒咗，覺得條頸有啲麻痺，洗面時居然洗出一盆血水，而更驚嚇嘅事仲响後頭，朱太一照鏡，發現原本平平無奇嘅樣變到靚爆鏡，笑嗰時仲有酒窩添，不過大整蠱嘅係，佢頸上留下一圈紅線，以連接位做分界，兩截皮膚根本唔同顏色。

與此同時，吳御侍個千金被殺，身首異處，個頭仲無緣無故消失，後嚟有人見到同吳千金一模一樣嘅朱太，認為朱爾旦係殺人兇手，於是走去告官。經過一輪審後，陸判見到朱爾旦，話可以叫吳千金自己講出真相。當晚，吳千金向父母報夢，話朱爾旦係清白，仲講埋真正兇手嘅身份，令一切水落石出。

對於件事，作者蒲松齡評價移花接木嘅做法係癡心妄想。計阿史話，唔中意個樣要換，都要問過當事人同意先，加上吳千金被殺已經夠慘，就唔好滾搞人哋喇。

圖片嚟自電視劇《聊齋（貳）》嘅換頭情節，麥包飾演朱爾旦，駱應鈞係陸判，至於邊個係換頭前後，唔好話你估唔到呀。網絡圖片