《封神榜》暴虐嘅紂王、《烈火雄心》嘅Marco等角色，令鄭子誠幾乎同奸角畫上等號，佢之前仲攞埋電視台嘅專業演員獎，勢力備受肯定。唔講唔知，原來佢曾經入圍電視台最厭惡角色演繹大獎，真係奸到你唔信！

鄭子誠一開始加入無綫時係做《東張西望》前前前身《城市追擊》嘅主持。1995年開始，鄭子誠响《真情》飾演又奸又衰、觀眾憎到咩咁嘅李子浩，根據報道，嗰角色原本係一個戇直嘅後生仔，點知監製慧眼，認為鄭子誠眉宇間滲出奸意，於是突發奇想，令子浩去到半路變咗奸角。鄭子誠有幾成功？除咗觀眾嘅認同及支持，佢仲入圍1997年嘅最厭惡角色演繹大獎，可惜最尾輸咗畀同劇飾演歸亞美嘅馬蹄露。

鄭子誠近年被網民封為完美奸人，覺得就算佢做正正常常嘅角色，背後都隱藏住啲不可告人嘅秘密或者陰謀。眼超超、戚起半邊嘴角笑、半瞇眼；奸得嚟有啲陰濕、賤賤格格、笑騎騎放毒蛇咁，搞到觀眾咬牙切齒甚至想狠狠咁星佢一巴，鄭子誠嘅豐富表情，令觀眾明白到，奸，其實都可以有唔同演繹方法。唔少網民好中意鄭子誠，改圖時用佢嘅奸樣嘅頻率超高，可以話係就算大家未用過都見過佢啲圖。

鮑魚龍蝦食得多都會想轉口味，演戲都唔例外，因為唔少劇都「無奸不歡」，所以鄭子誠2000年左右開始覺得套套都係咁，一度感到氣餒，而陪伴佢度過難關嘅，除咗太太，仲有音樂。一把磁性聲線係鄭子誠嘅煞食武器，更令佢有本錢擔任電台節目《音樂情人》嘅主持。不過於奸角同音樂之間遊走，鄭子誠都覺得有啲精神分裂，當佢拍完電視嘅殺人放火劇情，半個鐘後返電台開咪，心態同情緒完全兩極，佢都忍唔住話「覺得自己有少少變態」。今年佢响《跳躍生命線》入面飾演刑sir，由頭到尾都係忠直角色，令觀眾可以見到佢嘅多方面演技喇。

圖片嚟自網絡。