「She bangs！She bangs！」走曬音嘅歌詞，加埋騎呢舞步，居然可以令人一夜爆紅。本身係美籍香港人嘅William Hung孔慶翔，喺2004年參加美國節目《一夜成名》（American Idol），大唱Ricky Martin名曲《She Bangs》，雖然佢五音不全、舞姿「與眾不同」，但係佢被叫停之後講咗句 「I already gave my best, I have no regrets at all 」呢句名言，令大家對佢另眼相看。

《一夜成名》出局後，William諗住就咁玩完，點知片段出街之後，佢一炮而紅，瞬間收到過百個電郵，邀請佢去表演、訪問。之後瘦身飲品公司Kancura 美身茶療搵William拍廣告，就係入面兩句「蘋果加玫瑰，令你更嬌麗」、「一切夠真，只有美身」，令香港人更加容易認住佢個嘜頭。之後佢擔正同薛家燕拍咗套賀歲片《我亞媽發仔瘟》，於2005年上映，但只錄得12萬左右票房，成為當年香港最差票房第4位。

講返William嘅生活，佢早幾年同護士老婆離婚，雖然經歷第二次婚姻失敗，但佢依然保持樂觀，期待第三位真命天女嘅出現。佢而家喺美國加州生活、做演講師，以自己嘅經驗鼓勵其他人。