阿史早排睇報道，先知南韓政府考慮參與中國「一帶一路」倡議。諗起呢十幾廿年，韓國文化响中國的確有好大影響，特別係中國年輕人深受「韓流」影響，連大陸演藝界基本上都係承襲韓風。不過阿史今次想講嘅唔係韓流有幾犀利，而係韓流幾時興起。

簡單而言，「韓流」意思就係韓國流行文化，近廿年嚟韓國流行文化通過各種渠道响亞洲地區產生巨大影響力，甚至有人認為韓流代替响八九十年代盛行嘅日本流行文化。韓國流行文化之所以興起，有研究就話係同上世紀八十年代南韓嘅政治環境有關。當年南韓從威權統治轉型為民主政制，以往受限制嘅電視製作得而鬆綁，刺激咗影視文化嘅創作風潮。到咗九十年代，响南韓政府推動下，鼓勵文化產業進軍海外市場，响1994年，南韓政府嘅文化觀光部就設立咗文化產業局，專門針對唱片、電影、出版以及文化產業企劃等事務。

不過當時有啲意料之外嘅係，南韓當局政策重點放响發展電影，但令亞洲各地觀眾認識韓國流行文化嘅就係韓劇。有分析指，南韓國內三間電視台激烈競爭，令到韓劇同電視節目質量不斷提升，題材亦向多元化發展，呢個亦係韓劇响亞洲具競爭力嘅重要原因。隨住韓劇大受歡迎，連帶南韓電影、流行音樂同綜藝節目都漸漸受各地民眾接受，令韓流成為亞洲流行文化嘅主流。

原圖來源：Wikimedia Commons