早排去咗轉警隊博物館，發現咗一啲得意嘢，一於同大家分享吓。話說香港之前有好幾條街嘅街名原來都有「差館」兩隻字，包括港島嘅差館上街、紅磡嘅差館里等，唔講唔知，原來今日嘅上海街、通州街同大沽街，以前其實係「三兄弟」，齊齊叫做差館街，佢哋究竟有咩關聯？幾時改名？即刻話你知。

其實依幾條同差館有關嘅街道名，多多少少都係同嗰區嘅差館有關。早期啲街道未有正式名稱，市民於是將警署所在嘅街道叫做差館街，易記又簡單。油麻地嘅上海街响1873年叫差館街，當時係因為油麻地警署啟用而得名，條街可以話係當時油麻地嘅地標。而紅磡嘅大沽街，响1880年代已經叫做差館街，嗰名要多得1872年落成嘅紅磡警署。至於大角咀嘅通州街，唔駛問都係有間警署喺左近。

不過隨住警署越開越多，搞到出現好幾條差館街，於是政府1909年幫啲街道改名，避免混淆。油麻地嘅差館街就係咁而變咗上海街、紅磡嘅差館街變做大沽街，而福全鄉，亦即係依家大角咀嘅差館街就叫做福州街。至於點解會用上海、大沽同福州？因為三個城市當時都係中國對外通商口岸之一，聲名在外，就借嚟一用。

至於大沽街旁邊嘅橫街差館里，成為九龍半島唯一保留到依家、仲係用差館命名嘅街道。眼利嘅史友會問，通州街去咗邊？其實佢就係福州街，只不過係因為改完再改，先被命名為通州街，同其他「兄弟」嘅關係越嚟越淡……

原圖嚟自網絡。