香港人對菲律賓嘅印象，可能係嚟香港打工嘅家傭，又可能成日打風，又或者係佢哋個前總統阿基諾三世。不過阿史想講嘅，其實响戰後，菲律賓嘅經濟曾經係亞洲領先，更加係亞洲嘅經濟金融中心。

响上世紀五六十年代，菲律賓曾經係東南亞地區最富裕嘅國家。戰後嘅菲律賓，得到美國嘅幫助，响政治上建立一套民主政治制度。當時亞洲大部分國家仲係笠笠亂嘅時候，菲律賓政治環境相對穩定，於是慢慢吸引咗好多外來投資，亦造就咗成為亞洲經濟活動嘅中心，亦成為咗區內嘅金融中心。

依家嘅港鐵主席馬時亨就曾經講過，响1973年佢投身於銀行業嘅時候，菲律賓當時亞洲區內嘅銀行業主要中心，所有大型跨國銀行都會派遣高管進駐當地，當時嘅香港都仲未成為國際金融中心。佢仲話，前財爺梁錦松都曾被派往菲律賓受訓。而於1966年成立，由美國同日本主導亞洲開發銀行，總部就係座落响菲律賓馬尼拉。

不過，隨著馬可斯專政，貪污問題變得非常嚴重，加上區內其他國家經濟起飛，好似亞洲四小龍冒起，中國八十年代開始改革開放咁，外資同外國企業都開始將陣地轉移到其他地方，菲律賓政府除咗搞唔掂貪污問題，金融危機、外債等問題都令菲律賓經濟狀況轉差，一代亞洲金融中心亦走向沒落。近年，阿基諾三世上台之後，係咁話經濟有好大嘅增長，但國家經濟發展慢慢偏向局部產業，社會貧富懸殊問題非常嚴重，要重新成為亞洲金融中心，呢條路似乎仲有一段好長嘅距離。