唔講唔知，菲律賓係東南亞地區最先實現類似西方國家民主選舉制度嘅國家，不過制度就令到國家出現唔少問題。

菲律賓响美國允許下，於戰後（1946年）宣佈獨立，並由自由黨和國民黨輪流執政，實現在西方國家方式嘅民主選舉制度。不過，當1965年，本身係自由黨嘅參議院議長馬可斯，為咗選總統而改投國民黨，最終贏出總統大選後，菲律賓亦開始步入佢獨裁統治20年嘅歲月。佢做咗總統之後用人唯親，國內政治、經濟、社會都出現混亂，菲律賓更出現反政府游擊隊，而馬可斯响1972年宣佈戒嚴令，令佢可以合法地打壓佢嘅政敵同埋可以無限制咁連任總統。不過，由於馬可斯親美同反共嘅政治取態，即使佢响菲律賓實行獨裁統治美國都無叫佢落台。

直至八十年代，當時菲律賓反對派領導阿基諾從美國返去菲律賓，不過一落機就俾人暗殺，呢件事引起菲國內外震動。後嚟馬可斯為咗令自身統治更有認受性，於是响1986年提前總統大選，响一片舞弊買票嘅情況下，馬可斯擊敗咗阿基諾夫人，但由於好多選票有問題，搞到大批民眾包圍總統官邸，亦由於馬可斯做得太肉酸，結果搞到眾叛親離，馬可斯最終要逃亡去美國，阿基諾夫人得到美國支持，成為咗菲律賓總統。

雖然馬可斯專政結束，但菲律賓政治基本上係俾幾個大家族壟斷，所以官商勾結貪污問題响菲律賓從來無得到根治。有評論就話，菲律賓政客投身政治，大部分目的唔係為咗改善國家現況，而係通過選舉擴大自己嘅政治影響力，從而分享「經濟成果」，所以邊個做總統，邊個做市長，基本上無分別。