喺1925年3月12日，國父孫中山於北京病逝，佢留低咗一共3份遺囑，分別係《政治遺囑》、《家事遺囑》同《致蘇聯政府遺書》，但呢3份遺囑其實都唔係由孫中山親自寫或者口述嘅，而係其他人寫完拎俾孫中山簽嘅，當時到底發生咗咩小插曲？

話說喺1925年2月24日，孫中山病危，當時孫中山個仔孫科、國民黨中央執行委員汪精衛陪伴在側，汪精衛就好婉轉咁叫孫中山留低一啲「教誨之言」，以便遵照執行。孫中山當時唔知講咩好，汪精衛就話準備咗幾句說話，睇下孫中山贊唔贊成，結果孫中山同意《政治遺囑》同《家事遺囑》上嘅內容，但呢個時候孫中山聽到夫人宋慶齡喊得好傷心，所以無簽住，最後到咗臨終前一日，即係3月11日，孫中山先勉強用手揸筆補簽。

至於孫中山《政治遺囑》同《家事遺囑》係出自邊個之手，就有唔同講法，其中一個主要講法就係話出自汪精衛，而《致蘇聯政府遺書》就係出自蘇聯顧問鮑羅廷之手。孫中山《政治遺囑》入面，最著名同廣為人知嘅，莫過於「革命尚未成功」一句，至於《家事遺囑》，就提到佢留低嘅書、衫、住宅等，全部返畀慶齡做紀念。

原圖取自網絡。