2016年今日，被譽為「最後的大家」嘅著名作家、翻譯家楊絳逝世，享年105歲。被作家兼丈夫錢鍾書稱為「最賢的妻，最才的女」嘅楊絳精通中、英文、法文，佢仲自學西班牙語，翻譯名著《堂吉訶德》。中譯本响1978年出版時，西班牙國王到訪中國，鄧小平响楊絳有份出席嘅國宴上，將本書當做禮物送出去，可見佢嘅作品有幾咁高質。

楊絳出生於無錫世家，佢嘅第一篇散文《收腳印》喺讀研究生期間响《大公報》副刊發表。著名學者朱自清喺楊絳當時嘅老師，楊絳將《收腳印》交俾朱自清修改指點，點知朱自清睇完之後話呢篇文無咩好改，仲將篇文推薦咗俾《大公報》刊登。之後楊絳仲陸續寫咗《干校六記》、《將飲茶》、《走到人生邊上》等，當中有唔少作品仲被編入教科書或文史科必讀文章。

提起楊絳，就不得不提丈夫錢鍾書，兩人呢段超過半個幾世紀嘅婚姻廣為人稱頌，加埋兩人嘅女兒錢瑗，就係楊絳著名作品《我們仨》嘅主角。錢瑗生前打算寫一本《我們仨》，連寫作大綱都有埋，可惜因為早逝而未能如願。女兒同丈夫先後離世，楊絳忍住喪親之痛，為女兒完成遺願，先有咗呢本充滿對親人追憶嘅《我們仨》。

圖為楊絳一家三口，原圖嚟自網絡。