殿堂級播音員—李我

阿史呢排都係繼續執書櫃，呢個過程就好似尋寶咁，搵返好多年前嘅一啲經典出嚟，而今次搵到嘅就係殿堂級播音員李我嘅「李我講故」系列，所以阿史就想先介紹下呢位傳奇人物。

李我，原名係李晚景，係上世紀50年代到70年代好出名嘅一位播音員。自細喺香港長大嘅李我，喺華仁書院畢業，跟媽媽學唱粵曲，13歲嘅時候亦都跟隨名導演湯曉丹學習編劇，仲曾經組過「新春秋劇團」到廣州演出，表演經驗相當豐富。

咁到底李我幾時開始從事播音業呢？答案係廣州風行電台台長聽到佢粵劇表演之後，就決定畀個機會呢個後生仔，咁就開始咗廣播劇主持嘅生涯。而講到佢最轟動嘅一件事，就係1946年始創廣播劇《天空小說》！《天空小說》係佢嘅成名作，李我就單憑幾十個字嘅大綱即席演繹，仲包辦廣播劇入面所有角色，呢個舉動轟動省城，唔少電台都爭相招攬佢加入。當年香港麗的呼聲重金禮聘李我加盟，一年之間多咗6倍訂戶。