省港澳「典當業大王」——高可寧

尋日就同史友們介紹到上世紀喺灣仔相當出名嘅英京大酒家，呢座當年樓高五層設有電梯嘅大酒家係屬於當年省港澳「典當業大王」高可寧嘅物業，今次阿史就同大家介紹下呢位人物啦！

呢位港澳實業家、慈善家嘅一生係相當傳奇，佢1878年出生喺一個貧困嘅家庭，幼年喪父令到佢好細個就要離鄉去到街頭打鼓賣唱維生。去到1911年，佢就向澳門當局承投澳門番攤攤館經營權，並且喺福隆下街設立名為德成公司嘅攤館。再過幾年，佢仲承投埋澳門鴉片煙嘅經營權，冇幾耐佢嘅業務就已經涉及到安輪船公司、德生按、德成按、富衡銀號等等。而講到最威水，就係喺1937年同埋傅德用合營泰興公司承投澳門博彩業專營權，足足營運咗二十幾年，仲喺新馬路中段建立旗艦賭場。

佢經營賭業但同時亦都熱心公益，高可寧喺唔少地方都開設學校，亦都向香港東華三院捐建學校，即係東華三院高可寧紀念小學。同時佢又對澳門好多間慈善機構大額捐助，甚至仲捐埋自己嘅物業出嚟做醫院。1955年，高可寧喺香港寓所病逝，享年77歲。