尋日香港「劍神」張家朗就喺奧運劍擊項目當中創下歷史，拎到回歸以嚟嘅第一面金牌。但其實喺近25年嚟，有唔少運動員都為咗香港體壇付出咗巨大嘅努力，其中一位就係傷殘運動員蘇樺偉。
近排由吳君如監製兼主演嘅《媽媽的神奇小子》就係以呢位傳奇人物作為藍本，雖然電影仲未上映，但一段段預告當中嘅對白就已經觸動唔少人心。蘇樺偉係香港田徑項目傷健運動員，佢天生患有痙攣，喺一個低收入家庭入面長大。而喺1994年，佢就獲得傷健運動員教練潘健侶發掘，第一次喺1996年參加男子4x100米接力阿特蘭大傷殘人士奧運會並且拎到金牌；由於有咁優秀嘅成績，佢連續三屆都有繼續參加傷殘人士奧運會並且奪冠而回。
而去到2007年，佢經潘健侶引薦轉而受歐陽家駒訓練，喺艱苦嘅訓練之後，佢喺日本殘疾人士田徑錦標賽以12秒15及24秒75打破自己所保持男子100米（T36級別）世界紀錄及200米（T36級別）世界紀錄，真係快到嚇死人！
而去到2014年佢受腰傷困擾而未能奪得獎牌，其後於2016年正式退役結束佢長達21年嘅競技生涯。佢付出過嘅汗水同埋努力，絕對值得大家記住佢！
原圖嚟自網絡