「我的眼睛就是尺」 短道速滑女王王濛

近排喺冬奧賽事嘅直播當中，喺短道速滑混合接力隊決賽當中曾經奪得奧運4金短道速滑選手王濛就喺解說當中妙語連珠，甚至見到中國隊衝線一刻搶先喺官方之前宣佈「中國隊肯定贏了」，仲揚言「我的眼睛就是尺」。到底點解佢咁有自信講出呢句說話呢？阿史今次就同大家介紹下佢啦！

其實有睇開冬奧嘅史友，對王濛呢個名應該唔會陌生。呢位出生喺黑龍江嘅中國代表，早喺10歲嘅時候就開始練習滑冰，喺2002年就第一次參加世界青年錦標賽，並且拎到女子500公尺冠軍，成為中國第一位世界青年錦標賽冠軍。自此之後，佢就喺世界賽事嶄露頭角，拎過3000公尺接力冠軍以及多個世界盃賽事冠軍。

而講到最經典嘅，唔單止係係佢喺2006年冬季奧運會入面奪得一金一銀一銅，喺短道速滑女子500公尺贏得中國代表團首枚金牌，仲有佢喺齊齊哈爾十一冬運會入面，喺短道速滑一連奪得七面金牌，係歷屆全國冬季運動會中贏得最多金牌嘅運動員。王濛喺短道女子500公尺開創咗「濛時代」，直到依家佢仍然都係中國短道速滑神話！