就嚟又到夏天，一諗起呢個季節自不然就係同西瓜呢樣消暑水果有關，而今時今日大家之所以可以咁平價就食到靚西瓜其實真係同以下阿史要介紹嘅呢個人有重大關係！

其實喺古代，要食西瓜真係唔係一件平常事，就算係《紅樓夢》當中富貴逼人嘅賈府，都只係可以食得三次西瓜，可想而知呢樣水果喺古時係幾咁貴重。咁到底中國係點樣成為世上最大嘅西瓜生產國以及消費國呢？咁就同新疆「瓜奶奶」吳明珠有關喇！

今時今日嘅國人之所以可以「自由吃瓜」，就係同呢位出生喺1930年嘅袁隆平同學，吳明珠有關！佢喺1953年畢業於西南農學院園藝系果蔬專業，大學畢業之後佢就被分配到中央農村工作部，但喺佢堅持之下，佢就去到新疆吐魯番地區工作。

佢窮畢生之力，從事新疆甜瓜、西瓜育種事業，先係選育出紅心脆、香梨黃、小青皮等品種，喺90年代甚至仲選育出知名嘅「8424」成為江浙一帶早熟優質西瓜主栽品種並逐漸向北方各省擴展。佢一生培育咗三十幾個西瓜品種，唔單止挽救一批瀕臨絕跡嘅資源，仲令到吐魯番、鄯善縣等地湧現出一批甜瓜致富村。

原圖嚟自網絡