最近睇到個報道，話廣東南沙嘅港人子弟學校响九月一日開課，作為改革開放最先發展起嚟嘅地區，廣東省生活同居民環境已經同香港非常接近。講到改革開放，就不得不提改革開放總工程師鄧小平，而今日就係鄧公誕辰118周年。
鄧小平係四川廣安人，於1904年8月22日出生，原名鄧先聖，學名鄧希賢。1919年考入重慶勤工儉學留法預備學校，1920年夏赴法國勤工儉學，响1922年參加中國社會主義青年團，1924年轉為中國共產黨黨員，1926年初到蘇聯學習。鄧小平回國之後先後從事建立革命根據地同宣傳工作，1934年隨中央紅軍長征。抗日戰爭爆發後，鄧小平任國民革命軍第八路軍政治部副主任，負起領導華北敵後抗日根據地黨政軍工作。解放戰爭時期參與及指揮多場重要戰役，成為新中國成立初期嘅重要一員。响新中國成立後，鄧小平响政治生涯上亦遇過錯折，更特別係「文化大革命」時被批判為「黨內第二號最大的走資派」，下放江西勞動。後嚟重返中央又因「反擊右傾翻案風」中止咗鄧小平主持嘅全面整頓工作。
而隨著四人幫倒台，1977年鄧小平當選為中共中央副主席，而响1978年12月召開嘅中共十一屆三中全會，開闢咗中國改革開放同集中力量進行社會主義現代化建設嘅新時期，改革開放對國家發展意義重大，令中國國力騰飛，因此鄧小平被譽為「中國社會主義改革開放和現代化建設的總設計師」。有人就話，鄧公當年嘅眼光同遠見，改變咗億計嘅中國人命運，國力大大提升之餘，令百姓生活變得愈嚟愈好。另外，响鄧小平主政期間，落實於1997年對香港恢復行使主權及1999年對澳門恢復行使主權，更為世人所稱許。
原圖：cpc.people.com.cn