早前講咗戊戌變法主要發起人康有為嘅老師朱九江，今日就嚟講吓康有為嘅學生梁啟超。梁啟超除咗同老師康有為大力推動戊戌變法之外，佢自己亦係個學貫東西嘅大學者，同康有為比起嚟可謂青出於藍而勝於藍，咁大家又知唔知佢哋點樣成為師徒，後嚟又因咩事反目呢？

康有為雖然自幼聰慧，但就無意科舉，幾次名落孫山都唔多緊張。相反，梁啟超係喺廣東鄉試入面考到第八名嘅舉人，兩人初相識果陣，理論上梁啟超嘅功名係比當時只係監生嘅康有為高啲。點知兩個人閂埋門傾咗幾粒鐘之後，梁啟超話佢當時被康有為以「大海潮音，作獅子吼」嚟當頭棒喝，梁啟超先意識到自己以前所學嘅不過係用嚟應付科舉考試嘅手段，唔算得上係咩學問，於是毅然決定認康有為做師傅。跟住兩師徒拍住上推動戊戌變法，失敗之後，兩人先後逃到日本。

後嚟梁啟超大量閱讀西方著作之後，政見開始明顯改變，佢支持自由思想，仲以《自由書》為題寫文章，宣傳資產階級嘅自由、平等、博愛思想。呢啲西方資產階級思想同康有為嘅保皇、保教主張相去深遠，兩師徒亦開始漸行漸遠。梁啟超密切同孫中山等革命者聯絡，亦曾經喺「尊孔保教」問題上被康有為嚴厲批評過。武昌起義之後，梁啟超主張「和袁慰革，逼滿服漢」，反對任何人復辟帝制，而康有為依然固執己見，積極支持張勳復辟，令到兩師徒之間嘅矛盾越來越大。到後嚟，梁啟超甚至公開發表文章批駁康有為，康有為亦將張勳復辟失敗嘅怨氣發洩喺梁啟超身上，話佢係「梁賊啟超」，種種公開嘅筆戰導致師徒關係徹底惡化。

晚年嘅康有為同梁啟超關係雖然有所緩和，但曾經嘅師生之情亦無法掩蓋二人政治立場上嘅分歧，所以喺康有為過身之後，梁啟超嘅悼文裡面儘管肯定咗康有為早年嘅歷史貢獻，但亦都委婉咁批評佢喺在復辟帝制上所犯嘅錯誤。

原圖嚟自網絡。