今時今日,我哋寫嘢可以用白話文,而唔駛寫「之乎者也」嘅文言文,真係要多謝當初提倡白話文嘅胡適。1917年1月1號,胡適喺《新青年》發表咗一篇題為《文學改良芻議》嘅文章,文章入面提到「我手寫我口」,提出「八個主張」嚟改良中國文學,究竟係邊八項咁大影響?

胡適生於江蘇,19歲時去美國留學,五年之後轉讀哥倫比亞大學哲學系,師從美國哲學家杜威,胡適因而深受老師嘅實用主義影響,令佢回國之後嘅倡議亦都傾向實務為主。講返篇《文學改良芻議》,胡適提出嘅「八個主張」包括須言之有物、不摹仿古人、須講求文法、不作無病之呻吟、務去濫調套語、不用典、不講對仗以及不避俗字俗語。呢篇文章一出,隨即喺文化界引起巨大迴響,繼而掀起咗一場中國文學改革風潮。大家今日慣用嘅白話文,亦都因呢篇文章提出嘅主張而奠定日後嘅地位。

同年,胡適回國,喺北京大學任教,加入咗《新青年》嘅編輯團隊,大力推動新文化運動。

唔講唔知,胡適一生總共獲得35個榮譽博士學位,佢第一個榮譽博士學位就係由香港大學頒發嘅。1935年1月,胡適由上海坐船嚟香港,喺香港大學第26屆學位頒授典禮入面接受榮譽法學博士學位。而佢喺香港嘅5日行程由港大文學院院長傅斯德(Lancelot Forster)安排,當時胡適去過香港仔、深水灣、淺水灣、赤柱等地。咁多區入面,胡適尤其鍾意港島南區嘅美景,「香港應該產生詩人和畫家,用他們的藝術來讚頌這裏的海光山色。」

細圖為胡適喺香港接受榮譽博士學位嘅時候同何東爵士嘅合照,原圖嚟自網絡。