提起作家巴金，自然諗起《家》、《春》、《秋》。除咗依三本書，原來巴金同另外一位知名作家魯迅好有淵源。巴金自稱係魯迅最忠實嘅學生，仲曾經為魯迅抬棺添。

巴金原名李堯棠，出生於四川成都一個官宦家庭，佢曾經去過法國留學並開始文學創作。1929年發表嘅中篇小說《滅亡》引起轟動，令巴金正式走上文學創作嘅道路。上世紀30年代，巴金發表咗佢嘅「愛情三部曲」長篇小說《霧》、《雨》、《電》同「激流三部曲」《家》、《春》、《秋》，用激烈嘅情感嚟傾吐人民對不合理社會嘅痛恨，同埋對理想社會嘅執著與追求。佢後期創作嘅《隨想錄》更獲得全國優秀散文（集）、雜文（集）榮譽獎、意大利「但丁國際獎」、日本「福岡亞洲文化獎特別獎」等多個獎項，真係攞獎攞到手軟。

「講真話」係巴金一直以嚟嘅追求，呢種信念喺佢嘅晚年亦表現得格外明顯。佢坦誠無偽嘅表達手法令佢喺「新時期」文學入面起到一個「五四長者」嘅作用。喺巴金100歲生日當日，唔少內地傳媒都爭相為佢祝壽，可見巴金嘅影響力之大。《四川日報》話巴金係「中國二十世紀的良心」；《北京娛樂信報》譽之為「感動中國的作家」；成都《天府早報》就回顧咗巴金喺文革時期嘅痛苦，同埋佢喺上海華東醫院同病魔搏鬥嘅日子，話佢係「中國活得最苦的老人」。

原圖嚟自網絡。