唔知大家有無聽過茅盾文學獎？呢個係中國作家協會主辦嘅長篇小說獎，係中國文學界最高榮譽之一。呢個獎係根據著名作家、前中國作家協會主席茅盾遺囑同25萬蚊稿費而創立嘅獎項，以獎勵每年最優秀嘅作品。講起茅盾，可能未必咁多香港人識，其實佢係文學史界公認嘅中國社會剖析派小說壇主，呢一派來源於19世紀法國、俄羅斯嘅現實主義小說，又同中國古典世態小說兩相結合，佢嘅小說對五四運動之後嘅小說發展有深遠影響。

茅盾本名沈德鴻，生於浙江桐鄉縣烏鎮，佢十歲喪父，由母親撫養長大。茅盾由北京大學預科畢業之後，由於無力升學而入上海商務印書館做嘢，改革老牌嘅《小說月報》，成為文學研究會嘅首席評論家。跟住茅盾參與籌建中國共產黨，之後國共合作破裂、抗日戰爭期間，茅盾輾轉流亡到上海、日本、香港等地，開始陸續寫小說《幻滅》、《子夜》、《林家鋪子》、《春蠶》、《霜葉紅似二月花》、《鍛煉》等。茅盾嘅小說主要以反封建、反帝國主義、爭取民主、爭取自由為主，對五四時期嘅青年有啓發作用。

唔講唔知，茅盾曾經擔任香港《立報》嘅「言林」副刊編輯，言林主要刊登雜文、短論、詩歌等。為咗適應香港嘅報紙風格，茅盾仲親自執筆寫長篇小説《你往哪裏跑？》用嚟連載。據茅盾自己後嚟講，由於唔係咁適應香港邊寫邊登嘅風格，所以呢篇長篇小説以失敗告終。不過，《立報》喺香港嘅銷量唔多好，茅盾回憶話果陣嘅《立報》日日蝕錢，都唔係好維持得落去。

原圖嚟自網絡。