有「文壇祖母」之稱嘅冰心到90歲仍然堅持寫作，佢嘅散文集《寄小讀者》、《再寄小讀者》，鼓勵咗一代又一代嘅兒童去創作，係著名嘅兒童文學作家。佢出版咗詩集《繁星》、《春水》，更開啟咗「小詩」流行嘅新局面。其實冰心大學時已經係個略有名氣嘅作家，身邊追求者不斷，不過冰心偏偏睇唔上奉承佢嘅人，反而對用「另類方式」吸引佢注意嘅窮才子吳文藻另眼相看。

冰心原名謝婉瑩，福建長樂人，出生喺福州一個海軍軍官家庭，1914年考入北京著名嘅貝滿女中，仲以最高分畢業。冰心讀大學嘅第二年，遇著五四運動爆發，當時嘅冰心係學生自治會嘅文書，佢積極參與五四運動嘅各項宣傳，同時開始用「冰心」做筆名投稿俾報刊，寫咗《兩個家庭》、《斯人獨憔悴》等小說，仲出版埋詩集《繁星》、《春水》，成為民國有名嘅女作家之一。

冰心嘅作品以愛同美嚟做主題，充滿正能量，令人感到溫暖。冰心之所以能夠寫出咁多充滿愛嘅作品，同佢嘅美滿婚姻有好大關係。話說讀書時期，吳文藻得知冰心想選修英國詩人嘅課程果陣，就問佢：「有幾本英美著名的評論家評論拜倫和雪萊的書，你看過沒有？」冰心話無，吳文藻居然話「你學文學的，這些書你都沒看！這次出去，要多讀一些書。」呢招居然成功引起冰心注意，之後兩人不時有書信來往，以文字傳情。最後家境唔多好嘅吳文藻娶咗出身名門嘅冰心，成個婚禮以簡單嘅西方儀式舉行，總共用咗34蚊。婚後兩人歷經苦難，仍然相伴相守，正正應咗冰心嗰句「有了愛就有了一切。」

圖為冰心同吳文藻嘅結婚照，原圖嚟自網絡。