上次講起「中國球王」李惠堂嘅威水史，今次不如講吓佢嘅其他趣事。話說李惠堂細細個就同隔離屋嘅廖月英青梅竹馬，但係李爸爸就唔同意佢哋起埋一齊，仲要喺鄉下梅州市五華縣幫李惠堂訂咗頭親事。不過李惠堂就堅決反對，到咗大婚當日依然唔肯返去，李媽媽陳瓊笙為免婚禮取消，就搵咗李惠堂個妹李百妹同新娘入洞房「完婚」，最後呢位新娘喺李惠堂鄉下屋企住咗兩年之後就放棄等待，而呢件事亦成為五華縣嘅奇聞逸事。

喺1925年，20歲嘅李惠堂同廖月英去到上海生活，並且登報聲明結婚。李惠堂異性緣一啲都唔差，話說佢喺澳洲踢比賽嗰陣曾經有澳洲女仔追求佢，佢當時雖然未同廖月英結婚，但早已經心有所屬，所以就婉拒咗呢位澳洲女仔。請完人哋食檸檬，李惠堂都好識做，為呢個女仔寫咗首詩補返數：「澳洲有女垂青注，頻向場前喚代名，好夢難成春色暮，此心常繫百年情。」

原圖取自網絡。