演員鄭嘉穎同陳凱琳相差22歲，佢哋唔單止拉埋天窗，連仔仔都已經半歲大，可謂係娛樂圈父女戀嘅成功例子。相比起鄭嘉穎同陳凱琳，著名畫家張大千同佢嘅四太太徐雯波年齡差距仲大，但最後依然可以開花結果。咁佢哋究竟差幾多歲？30歲。

張大千喺識徐雯波嘅時候已經有三位太太，當時張大千因為同二太太黃凝素嘈交而心情麻麻，咁啱大女張心瑞就帶咗同學徐雯波嚟屋企。徐雯波鍾意畫畫，聽講張心瑞嘅爸爸就係著名畫家張大千，於是慕名前嚟拜會。徐雯波生得靚，張大千一見佢就將煩惱拋諸腦後，好開心咁拎自己嘅畫作出嚟分享。徐雯波被張大千嘅畫吸引，想要拜佢為師，點知張大千就耍手擰頭唔肯收徒。

無計，徐雯波唯有成日去張大千屋企睇佢作畫偷吓師，久而久之，兩人就日久生情。但係，徐雯波嘅姑母聽講兩人要結婚嘅消息之後好反對，兩人差成30歲，張大千嘅年紀做到徐雯波爸爸有多。但後嚟聽講徐雯波已有身孕，姑母唯有應承呢頭親事。結婚之後，徐雯波一直陪住張大千闖蕩國際藝壇，既係張大千作畫嘅靈感女神，又係佢嘅紅顏知己。就連張大千後嚟離開內地、輾轉各地，都只係帶住徐雯波同細女，兩人感情深厚可見一斑。

圖為張大千同徐雯波，原圖嚟自網絡。