喺李連杰嗰套《黃飛鴻之男兒當自強》電影入面，黃飛鴻護送革命黨人陸皓東（姜大衛飾演）返去攞革命黨員名冊、逃避清廷追捕，期間陸皓東傷重不治，每次睇到呢一幕，阿史都好感動。而歷史上嘅陸皓東就為咗保護黨員名冊，不惜身陷險境，最終被清廷逮捕。响1895年11月7日，陸皓東被處死，終年只有27歲。

陸皓東係廣東香山縣翠亨村人，同孫中山係同鄉、同學，細細個就已經成為好朋友。陸皓東同孫中山都對清廷腐敗同不良嘅社會風俗好不滿，有一次佢哋打爛咗村廟入面嘅神像，激嬲咗啲鄉紳地主，於是佢哋離開家鄉，嚟到香港。佢哋喺香港接觸到基督教，並且受洗成為基督徒，後來孫中山同陸皓東先後到廣州博濟醫學堂，更成為室友。

1894年，孫中山喺美國檀香山籌組革命組織興中會，陸皓東就喺國內幫手從事聯絡工作，招攬革命志士。1895年孫中山返到香港，陸皓東同其他革命志士嚟到香港同孫中山會合，成立香港興中會總部。同年3月，清廷响甲午戰爭中戰敗，興中會決定趁呢個機會發動武裝起義，奪取廣州作為革命根據地。

原本計劃於同年10月26日重陽節起義，但點知因為運送槍械被海關截獲，導致本身係主力嘅香港隊伍遲遲未到，打亂部署，再加上當時兩廣總督譚鐘麟收到告密，緊急調兵回城防禦，並派軍警搜捕革命黨。陸皓東收到消息之後，即刻安排孫中山同其他革命黨人離開，但離開嘅時候醒起可能仲未帶走或者銷毀黨員名冊，佢決定返轉頭，發現名冊果然仲喺度，但呢個時候軍警已經將佢包圍，佢嗱嗱聲燒咗本名冊，等到軍警破門而入，名冊已經燒成灰燼。陸皓東被捕之後，遭到被嚴刑逼供，但佢寧死不屈，最終响1895年11月7日被處死，年僅27歲。 

圖為《黃飛鴻之男兒當自強》劇照、陸皓東像，取自網絡。