軍閥割據時期，直系將領、「笑面虎將軍」孫傳芳喺1935年今日被刺殺身亡，而殺佢嘅居然係一個手無縛雞之力嘅大家閨秀施劍翹。施劍翹為咗報殺父之仇，足足用咗十年時間去籌備、策劃刺殺孫傳芳，真係少啲毅力都唔得。

施劍翹原名施谷蘭，佢嘅父親係奉系將領張宗昌嘅下屬，因為拒絕同孫傳芳合作做內應倒戈，而被孫傳芳下令殺死並暴屍街頭。從此施劍翹嘅人生得返為父報仇呢個目標，佢亦曾經將報仇嘅希望寄託喺堂兄同丈夫身上，但佢哋都相繼背信棄義，施劍翹唯有靠自己完成。

為咗報仇，施劍翹帶住兩個仔離開丈夫，忍痛做手術將自己嘅一對小腳放開，並四處打探孫傳芳嘅信息，企圖接近佢。皇天不負有心人，施劍翹終於打探到孫傳芳信佛，經常去居士林聽經。施劍翹於是加入居士林，安頓好母親同兒子之後，喺居士林開咗三槍殺死孫傳芳。成功為父報仇之後，施劍翹發傳單將自己嘅身份公諸於世，並去公安局自首。不過，由於孫傳芳唔得民心，加上有當時國民政府要員馮玉祥幫忙，國民政府最終赦免咗施劍翹。施劍翹嘅復仇故事更令佢得到「俠女」、「烈女」等稱號。

圖為施劍翹、孫傳芳，原圖嚟自網絡。