無論對音樂有無研究都好，「莫扎特」呢個名大家都一定聽過——就算無聽過佢作嘅曲。90年代初有幾位美國心理學家做咗個研究，結果顯示，聽咗莫扎特嘅《D大調雙鋼琴奏鳴曲》嘅人，佢哋喺智力測驗嘅表現明顯比其他無聽莫扎特嘅人好。於是「莫扎特效應」席捲全球，好多家長紛紛俾自己嘅仔女聽莫扎特樂曲，希望佢哋可以聰明啲。就連有啲牧場都俾牛聽莫扎特，據講會增加牛奶產量同令啲牛肉好食啲咁話。聽咗莫扎特嘅音樂會唔會變神童，阿史真係唔知，不過，莫扎特本人就真係個音樂神童。

年紀細細嘅莫扎特，就做到尋常人窮盡一生都未必完成到嘅事：4歲學琴，6歲就開始作曲仲以鋼琴家嘅身份登台，到咗13歲更加做咗奧地利薩爾茨堡嘅樂隊長。而喺莫扎特短短35年嘅人生裡面，足足寫咗近千首作品，無論係歌劇、交響曲、奏鳴曲、協奏曲定係四重奏，各類型嘅音樂都難唔倒佢。天分之餘，莫扎特嘅成就同佢嘅家庭背景有好大關係。莫扎特嘅父親係當年歐洲最出名、嚴謹嘅音樂老師，莫扎特3歲就開始接受父親嘅特訓，學習演奏樂器、樂理同埋作曲，可謂贏在起跑線上。所以話呢，天才都要靠後天努力先得嘅。

原圖嚟自網絡。