二次世界大戰嘅其中一個成果，係《世界人權宣言》嘅誕生，以及全世界對人權事業嘅重視。但可能冇太多人知道，呢份《世界人權宣言》嘅誕生，唔少得一位中國人嘅身影，佢叫張彭春。

張彭春1892年生於天津，哥哥係著名教育家、南開大學創辦人張伯苓。抗日期間，張彭春受當時國民政府嘅徵召，去西方國家宣傳抗日，爭取外援。1940年，張彭春正式加入外交工作，出任駐外使節，先後做過中國駐土耳其、智利大使。

1946年1月，張彭春赴倫敦，擔任聯合國創辦會議嘅中國代表，更被任命為聯合國經濟、社會和文化理事會嘅中國首席代表，兼聯合國人權委員會副主席，直接參與《世界人權宣言》嘅起草。但所謂「眾口難調」，更何況係一份令各國認同、接受嘅《人權宣言》，而張彭春就喺宣言嘅起草過程中經常成功地調解爭端。

更重要嘅係，喺張彭春嘅努力下，《宣言》打破咗西方中心主義。原本《宣言》草案第一條就帶有強烈嘅基督教色彩，引起各國疑慮。張彭春就提出，一個作為保護和尊重全人類基本人權和自由嘅宣言，所反映嘅觀念唔應該過於狹窄，之後起草委員會刪除咗草案裡面嘅「本性」一詞，仲將中國儒家嘅「仁者愛人」思想放入宣言之中。張彭春將「仁」翻譯成conscience（良心）一詞，為各國代表認可，從而寫入了宣言第一條：「人人生而自由，在尊嚴和權利上一律平等。他們賦有理性和良心，並應以兄弟關系的精神相對待」。

根據當時會議記錄等相關資料，《宣言》宣布嘅30個條文及一個序言中，張彭春直接作出貢獻嘅就有11個條款。當時擔任聯合國人權司司長嘅加拿大人約翰•漢弗萊就曾經形容，張彭春係最受人尊敬嘅代表之一，係一位「妥協藝術大師」，帶領委員會走出僵局。

原圖取自騰訊。