香港最古老天后廟 佛堂門天后古廟

阿史之前就同大家介紹過九大石刻之中唯一位處內陸嘅黃竹坑石刻，有史友就好有興趣，想阿史講多啲呢類遠古石刻同埋古廟，咁就當然冇問題啦！喺清水灣半島以南、東龍島附近嘅佛堂門，唔單止有一塊被列為法定古蹟嘅大廟灣刻石，仲有一座號稱係廣東以及香港最古老天后廟，呢座就係一級歷史建築物佛堂門天后古廟。

相傳喺宋朝年間，就有姓林嘅福建人落到九龍一帶開村，佢地以運鹽北上為生，但點知一次出海就遇到大風，喺船被打沉嘅時候，呢兩兄弟就叫天后娘娘出嚟打救佢哋，最後佢哋就被吹到東龍島上面平安無事。事後佢哋就覺得係天后娘娘顯靈，於是就集資喺附近起一座天后古廟。

佛堂門天后古廟係三開間單進設計，而且前面有一大塊空地，正面睇落相當壯觀。正殿就當然係用嚟供奉天后，偏殿分別放有天后龍床、2艘長2米幾長嘅天后神舟模型、清朝嘉慶4年嘅鐵香爐同埋道光20年鑄造嘅銅鐘，充滿歷史嘅氣息。