西環七臺同一位詩人有關？

呢排阿史都同大家介紹唔少香港嘅地名起源，講完荃灣幾個特色嘅地方之後，今次就想介紹下西環七臺。

如果有史友行過路過，應該都會知西環七臺並唔係平路，而係好多條好長嘅樓梯。西環七臺位於堅尼地城，係一個歷史好悠久嘅住宅區，以前好多喺山上開墾用嚟做起屋嘅平地，都會叫做「臺」。西環七臺所在嘅位置以前係西環山，由富商李陞購入，後來交畀李寶龍發展住宅物業，點知後來李寶龍因為生意失敗而要賣山還債。

講咁耐，西環七臺到底係邊七個臺呢？原來係太白臺、羲皇臺、青蓮臺、桃李臺、學士臺、李寶龍臺和紫蘭臺等七個，除咗李寶龍臺，其他都係同一位詩人有關，佢就係唐朝詩人李白。據講係因為李寶龍好鍾意李白嘅緣故，所以就用李白嘅字「太白」、別號「青蓮」、詩《春夜宴桃李園序》、《戲贈鄭溧陽》、《答杜秀才五松見贈》同埋曾經被任命為翰林學士嘅「學士」命名其中六個臺。至於李寶龍臺，就係後人為咗紀念李寶龍而改嘅。