今時今日要搵一個識得多國語言、精通中西文學嘅人可能唔係乜嘢難事，但係如果要喺清末搵到個咁嘅人，就真係萬中無一，所以阿史今次就想同大家介紹下呢位有「清末怪傑」之稱嘅辜鴻銘。

辜鴻銘祖籍福建，出生喺1857年嘅檳榔嶼，自幼就被義父送到德國學習科學，後來又去到英國繼續升學，喺愛丁堡大學、德國萊比錫大學同埋法國巴黎大學分別拎到文學、土木工程同埋法學學位，同時掌握英文、德文、法文、拉丁文同埋希臘文，真係不得了。

去到1880年，佢完成佢嘅學業返到檳城，但當時佢並冇繼續做佢政府嘅職務，反而係決心去到中國學習。喺1885年，佢就被張之洞委任為「洋文案」，幫手實施新政、編練新軍同埋負責高等教育，當年新開嘅自強學堂，就係由辜鴻銘負責教授英文。辜鴻銘授課非常受學生歡迎，仲成為自強學堂一代名師。

去到1905年，辜鴻銘就擔任上海黃浦浚治局督辦、1908年任外交部侍郎，1910年赴上海任南洋公學教務長。辛亥革命之後，佢就冇再做任何公職，反而係喺1915年去北京大學擔任教授，主講英國文學，冇幾耐仲去埋日本講學添。

辜鴻銘係中國第一人，可以精通西洋科學、語言同埋東方華學，佢嘅經歷豐富，自稱「一生四洋」，即係「生在南洋，學在西洋，婚在東洋，仕在北洋」。

原圖嚟自網絡