尋日就同史友們介紹完另一位以科教興國嘅傳奇人物，既然都講開古代傑出人物，阿史都唔差在介紹埋南北朝數學家祖沖之喇！

如果就咁介紹祖沖之，史友們可能唔知佢係乜水，但如果阿史講到圓周率，史友們讀書嘅時候都一定背過！祖沖之會計算圓周率並唔係一個偶然，佢出生喺一個歷代都研究天文曆法嘅家庭，自小就接觸天文、數學等等嘅知識，幼年嘅時候就已經係人所共知嘅天才，所以當時宋孝武帝仲邀請過佢到「華林學省」工作，其後仲喺朝廷任官。

祖沖之一生有過唔少成就，佢編制過《大明曆》，區分回歸年同埋恆星年，首次將歲差引進曆法；喺機械方面佢就設計過水力舂米、水碓磨、重新鑄造指南車；至於講到最出名，當然就係計算圓周率。《隋書·律曆志》有記載到祖沖之計算到圓周率，後世亦都有學者指出，中國人掌握呢個非凡圓周率分數比歐洲早出整整一千年之久，認真犀利！

原圖嚟自網絡