喺前日凌晨，抗戰老兵萬劍舞將軍喺明愛醫院逝世，終年一百零三歲。呢位萬將軍一生經歷都唔平凡，最後仲選擇喺香港長居，阿史今次就同大家介紹下佢嘅故事。

萬劍舞，又名萬簏斌，出生喺1918年，佢嘅爺爺曾經係大學士，佢自己五歲就熟讀三字經，十二歲就能填詞賦詩，再加上自幼習武，真係可以話係文武雙全。佢喺一九三九年考入黃埔軍校，並且喺兩年之後就被派到緬甸中國遠征軍，參加雲南、緬甸嘅抗日戰爭，亦即係史稱嘅滇緬戰爭。

喺呢場戰爭入面佢多次遇上危險，其中有一次佢所屬嘅排就要冒險行入森林，經歷二十幾日斷水斷糧之後，成個排就只係得返五個人生還，萬劍舞就係其中一個。去到一九四四年，佢就擔任十軍三師九團機槍上尉連長，率領部隊參加衡陽保衞戰，血戰四十七天後衡陽陷落。

而去到一九四九年，佢就去到台灣，最後以中將嘅身份退役。但之後佢並冇留喺台灣，反而係喺一九六二年嚟到香港，喺新法書院擔任文學講師，直到一九八五年先至退休，自此就長居香港。

原圖嚟自網絡