繼續同史友們介紹香港各區嘅重要古蹟，以往就同大家講唔少廟宇、圍村同埋石碑，呢啲古蹟大大話話都有幾百年歷史，之但係原來香港仲有小部分嘅古蹟，可能追溯到接近三千年之前，今次阿史就同大家介紹下啦！

今次阿史想介紹嘅就係位於香港島以南嘅蒲台島，喺呢個小小海島之上，其實就有唔少漁民都流傳住島上有幾組嘅石刻，但真正被傳媒同埋專家發現到就係等到上世紀六十年代。島上就有一塊海邊巨石係刻有一啲睇唔明嘅圖案，而呢個地方正正就係具有接近三千年歷史嘅史前時期石刻——蒲台島石刻。

蒲台島石刻主要嚟講就由一條闊0.7米石縫分成兩個部分，右邊嘅就係螺旋狀迴紋連結組成嘅圖案，而左邊部分據專家估計就應該係魚同埋其他動物組成，但由於風化得比較嚴重，所以紋路就比較淺。

咁到底呢個喺海邊嘅石刻有咩意思呢？專家就估計由於佢面對大海，石刻上嘅圖案亦都似雲雷紋，所以就有可能係古代先民出於對大自然嘅畏懼同崇拜而刻上、希望可以達到鎮海護航嘅作用。

原圖嚟自網絡