近排都同史友們介紹咗唔少我國嘅傳奇運動員，除咗郭晶晶、伏明霞呢啲熟悉嘅名之外，以下阿史要介紹嘅呢一位人物相信唔少史友都一定聽過，甚至仲專程入場睇過佢比賽，佢就超級丹林丹喇！

出生喺福建省嘅林丹據講就喺5歲開始學打羽毛球，並以12歲之齡喺1995年拎到全國青少年比賽男子單打冠軍，後來就喺2000年入選國家隊，當時佢係被視為重點球員進行培訓。

結果亦都不出吉新鵬教練所料，林丹喺2002年至2004年間就已經成為一個獨當一面嘅單打球員，兩年之內就拎到九項洲際比賽冠軍，初露鋒芒。其實喺2004年初，佢就已經好少輸波，並且以20歲之齡成為當時世界排名第一嘅球員，佢喺當年打敗丹麥名將彼得·蓋德之後就被對方稱為「Super Dan」，自此就有咗「超級丹」呢個名。

林丹雖然年紀輕輕就世界排名第一，但其實佢喺2004年雅典奧運會羽球男單比賽入面並冇拎到冠軍，反而係「滑鐵盧」輸畀新加坡球手林羽峰。而喺呢一役之後，林丹就痛定思痛，先後喺德國公開賽、中國大師賽、日本公開賽、香港公開賽拎到冠軍，仲喺世界羽聯比賽、全英賽等嘅比賽拎埋冠軍，後來連奧運金牌都拎埋，喺2009年-2010年度實現埋全滿貫，真係認真誇張！

之不過去到2020年7月4日，林丹宣布退役正式掛拍， 20年國家隊選手生涯就咁告終，想再睇佢打波睇嚟就冇乜機會喇！

原圖嚟自網絡