喺歷史上嘅當年今日，中國發生咗一件大事，事關喺1927年7月15日，汪精衛就喺北伐期間展開所謂嘅清黨反共，令當時珍貴嘅國共第一次合作被破壞咗。

當時正值係中國共產黨聯同國民黨展開北伐嘅時期，原本國民黨內部就係採取「聯俄容共」嘅方針，但點知喺北伐期間國民黨內部先至對呢個方針產生矛盾。其實喺北伐期間，共產黨就已經發動唔少工農運動，並且喺1926年嘅上海由周恩來組織上海工人第三次武裝起事配合北伐軍，已經取得唔少重大嘅成效。

但點知喺1927年4月12日，當時蔣介石就喺上海發動清黨，大批共產黨人被殺；清黨呢種手段亦都蔓延到其他地方，當時以汪精衛為首嘅武漢（漢）國民政府本身係反對，而蔣介石就另組南京（寧）國民政府，形成史稱「寧漢分裂」。

去到同年7月15日，汪精衛武漢國民政府亦都加入清除共產黨員，召集「分共會議」，正式標誌第一次國共合作破裂。呢次「分共會議」過後，中共決心組建自己武裝部隊，冇幾耐兩地政府合流遷都南京，史稱「寧漢合流」。

原圖嚟自網絡